20 қыркүйекте Сырым ауданында қазақтың Халық жазушысы, Мемлекеттік сыйлықтың иегері Қадыр Мырза Әлінің 90 жылдығына арналған мерейтойлық шаралар өтеді. Бұл туралы Өңірлік коммуникациялар қызметінде өткен брифингте аудан әкімі Жұмагелді Батырниязов мәлімдеді.
Әкімнің айтуынша, мерекелік бағдарлама Сырым батыр мен Қадыр Мырза Әлі ескерткіштеріне гүл шоқтарын қою рәсімінен басталады. Орталық кітапханада «Қадыр әлемі – руханият белгісі» атты әдеби-рухани зал ашылып, ақын атындағы мектеп ауласында муралдың тұсаукесері өтеді.
Тойтөбе алаңында аламан, топ және құнан бәйге, қазақ күресі мен арқан тарту сайыстары ұйымдастырылады. Сондай-ақ аудандық мәдениет үйінде Нартай Сауданбекұлының «Қадыр-Адам» драма-реквиемі сахналанады. Кешкісін орталық алаңда Еркебұлан Құмаров пен Әлішер Қонысбаевтың концерті өтпек.
Барша тұрғындар мен қонақтар мерейтойлық шараларға қатысуға шақырылады.
ӨКҚ — Ақпарат
