Сурет: sports.kz
Әлеуметтік желіде ұлттық құраманың бас бапкері Талғат Байсуфиновтың қызметтен кеткені туралы ақпарат тарады. Бұл жайында журналист Елдар Аманбаев мәлімдеді, деп хабарлайды Zhaiyqmedia.kz ақпарат агенттігі.
«Талғат Байсуфинов ұлттық құрамадан кетті», – деп жазды ол әлеуметтік желідегі парақшасында.
Байсуфинов соңғы жылдары отандық футболдағы ең танымал жаттықтырушылардың бірі. Ол бірнеше рет ұлттық құраманы жаттықтырып, Қазақстан Премьер-лигасының бірқатар клубтарын басқарған. Бас бапкер лауазымына 2026 жылдың 28 қаңтарында тағайындалған. Оның жетекшілігімен команда төрт матч өткізіп, екі жеңіске жетіп, бір ойында тең түсіп, бір матчта жеңіліс тапты.
Соңғы кездесу 9 маусымда өтті. Жолдастық матчта Қазақстан құрамасы сырт алаңда Венгрияға 3:1 есебімен жол берді.
Қазақстан футбол федерациясы ақпараттың нақтыланбағанын, жағдайға байланысты ресми мәлімдеме жасалатынын айтты. «Қазір нақты ештеңе айта алмаймын… Интернетте тараған ақпарат қой… Федерация ертең ресми мәлімдеме жасайды», – деді ҚФФ медиа-офицері Мұратбек Биманов.
8 маусымда ҚФФ Байсуфиновтың қызметінен кетуі мүмкін екені туралы ақпаратты жоққа шығарған еді.
