Сурет: Egemen Qazaqstan
Қазақ ұлттық аграрлық зерттеу университетінде екі мәрте Социалистік Еңбек Ері атанған атақты шопан Жазылбек Қуанышбаевтың туғанына 130 жыл толуына орай салтанатты шара өтті, деп хабарлайды Zhaiyqmedia.kz ақпарат агенттігі.
Қазақ мал шаруашылығының дамуына зор үлес қосқан Жазылбек Қуанышбаевты халық «Дала академигі» және «Малшылардың маршалы» деп атаған. Оның еңбек жолы мен табыстары бүгінгі ұрпаққа үлгі болып отыр.
«Жазылбек Қуанышбаев – қазақ даласының мақтанышы. Оның есімі мал шаруашылығы саласындағы еңбекқорлық пен адалдықтың символына айналды», — деді шара барысында университет өкілі.
Жиын барысында ғалымдар мен студенттер Қуанышбаевтың өмірі мен қызметіне арналған баяндамалар жасап, оның тәжірибесін қазіргі заманғы мал шаруашылығына енгізу жолдарын талқылады. Сондай-ақ, көрнекті шопанның мұрасын насихаттау мақсатында арнайы кітап пен деректі фильм түсіру жоспарланған.
