Ғылым және жоғары білім министрлігі қазақ тілін үйретуге арналған Steppe Rider ойынына шамамен 600 мың АҚШ долларын жұмсаған, алайда күрделі RPG-дің орнына Subway Surfers стиліндегі қарапайым «раннер» шыққан, деп хабарлайды Zhaiyqmedia ақпарат агенттігі.
Бұл ойынды санаулы адам ғана жүктеп алған. Ал оған жұмсалған қаражат әлемге әйгілі Subway Surfers ойынының бюджетінен үш есе көп. Қоғам белсенділері Ұлттық қауіпсіздік комитетінен (ҰҚК) тексеру жүргізуді талап етуде.
Бастапқыда мемлекеттік сатып алу порталында жарияланған тендер бойынша, министрлік балалар мен жасөспірімдерге арналған білім беру мақсатындағы ойын жасауға тапсырыс берген. Техникалық құжаттамаға сәйкес, ойын RPG жанрында болып, геймплей ұзақтығы кемінде 12 сағатқа созылуы тиіс еді. Сюжет бойынша ойыншы бәйгеге ат баптап, қазақ тілінің грамматикасы мен тарихын үйренетін тапсырмалар орындауы керек болған.
Алайда Steppe Rider ойыны уәде етілгендей күрделі стратегия емес, кәдімгі «раннер» болып шықты. Кейіпкер далада шауып, тиын жинайды да, кедергілерден қашып, қазақ тіліне қатысты сұрақтарға жауап береді.
Steam платформасындағы пікірлер де көңіл көншітпейді. Ойыншылар оның ішінде қателер көп екенін, геймплейдің іш пыстыратынын айтып шағымданған.
«Бұл RPG емес, қазақша сөздері бар Subway Surfers-тің арзан көшірмесі», – дейді ойынды жүктеп алғандардың бірі.
Ең сорақысы, әлем бойынша 4 миллиардтан астам рет жүктелген Subway Surfers ойынын жасауға шамамен 150-200 мың доллар жұмсалған. Бұл – Steppe Rider ойынына бөлінген бюджеттен үш есе аз.
