АҚШ Қаржы министрі Скотт Бессент теңіздегі танкерлерде тұрып қалған Иран мұнайына салынған санкцияларды алып тастауы мүмкін екенін мәлімдеді, бұл қадам Ормуз бұғазының жабылуына байланысты қымбаттаған мұнай бағасын төмендетуге бағытталған, деп хабарлайды Zhaiyqmedia ақпарат агенттігі.
Скотт Бессент бұл туралы Fox Business Network арнасына берген сұхбатында айтты.
«Алдағы күндері біз теңізде тұрған Иран мұнайына салынған санкцияны алып тастауымыз мүмкін. Бұл шамамен 140 миллион баррель мұнай. Бұл — Иран Қытайға жібермек болған 10-14 күнге жететін қор. Біз бағаны төмен ұстап тұру үшін Иранның мұнайын Иранның өзіне қарсы қолданатын боламыз», — деді ол.
Соңғы екі аптада Иранның Ормуз бұғазын жауып, танкерлерге шабуыл жасауына байланысты мұнай бағасы бір барреліне 100 доллардан асып кеткен болатын.
Бұған дейін Қаржы министрлігі осыған ұқсас қадамға барып, санкцияға іліккен Ресей мұнайын танкерлерден сатуға уақытша рұқсат берген еді. Бессенттің айтуынша, бұл шешім әлемдік нарыққа шамамен 130 миллион баррель мұнай қосқан.
Қаржы министрлігінің жоспарымен таныс дереккөздің хабарлауынша, егер АҚШ президенті Дональд Трамптың әкімшілігі Иран мұнайына қатысты санкцияларды жеңілдетсе, Ресей мұнайына қолданылған рұқсаттама сияқты уақытша шешім қабылдануы мүмкін. Бұл теңізде тұрып қалған шикізатты белгілі бір уақыт аралығында сатуға мүмкіндік береді.
«Ықтимал рұқсаттама Қытайға арналған мұнайдың әлемдік нарықтарға кеңінен таралуын жеделдетіп, жеткілікті қорды қамтамасыз етеді және Иранның Ормуз бұғазына қатысты ықпалын бәсеңдетуге көмектеседі», — деді аты-жөнін атамауды сұраған дереккөз.
Бессент сондай-ақ АҚШ мұнай жеткізілімін арттыру үшін басқа да шаралар қабылдайтынын, соның ішінде Стратегиялық мұнай қорынан қосымша көлем босатылатынын атап өтті.
Фото: Әлеуметтік желіден
