Жамбыл облысында екі кішкентай баланы терезеден лақтырып жіберген әйел ұсталды. Алдын ала мәлімет бойынша, ол сәбилердің анасы болуы мүмкін, деп хабарлайды Zhaiyqmedia ақпарат агенттігі.
Облыстық полиция департаментінің хабарлауынша, қазір сотқа дейінгі тергеу амалдары басталды.
«Күдікті ұсталып, уақытша ұстау изоляторына қамалды. Кәмелетке толмаған екі бала ауруханаға жеткізілді. Қазір қажетті кешенді тергеу шаралары жүргізіліп жатыр», – деп хабарлады ведомство.
Денсаулық сақтау басқармасының мәліметінше, 2021 және 2023 жылы туған сәбилерге дәрігерлер «жабық ми-бас сүйек жарақаты» және «ми ісінуі» диагнозын қойған. Үлкен баланың жамбас сүйегі де сынып, орнынан жылжып кеткені анықталды.
«Екі балаға да бас миына, кеуде қуысына, жамбас сүйектеріне компьютерлік томография жасалды және лапароцентез (іш қуысындағы артық сұйықтықты алу) жүргізілді. Сондай-ақ мидың ісінуіне қарсы терапия жасалды», – делінген басқарма хабарламасында.
Енді дәрігерлер үлкен сәбидің жамбас сүйегіне ота жасауға дайындалып жатыр.
Фото: Әлеуметтік желіден
