Атырауда NCOC компаниясының менеджерін қатыгездікпен өлтірген 38 жастағы Арман Жетпісов өмір бойына бас бостандығынан айырылды.

Тергеу мәліметінше, бұрын сотталған әрі тұрақты жұмысы жоқ күдікті жәбірленушінің автотұрақ алғысы келетінін білген. Ол құрылыс компаниясынан жеңілдік әперемін деп 400 мың теңге алып, уәдесін орындамаған. Әйел сотқа шағымданбақ болғанда, Жетпісов мас күйде үйіне барып, бірнеше рет пышақ сұғып, зорлық көрсеткен. Кейін оның ақша, алтын әшекей, телефон, көлігін алып қашқан.

Күдікті жол апатына түсіп, Маңғыстауда ұсталған. Оның жанынан марқұмға тиесілі заттар табылды. Келтірілген шығын 13 млн теңгеден асқан. Сот барысында Жетпісов: «Жүкті екенін білсем, өлтірмес едім» деген даулы мәлімдеме жасаған.

Үкімге сәйкес ол жазасын ерекше тәртіптегі түзету мекемесінде өтейді.