Жетісу облысында мемлекеттік субсидияларды жымқыру дерегі тергеліп жатыр. Бұл туралы Қаржы мониторингі агенттігінің департаменті хабарлады.

Субсидияны иемдену тәсілі

Тергеу мәліметінше, жергілікті ЖШС басшысы екі жыл бойы ауыл шаруашылығы басқармасына жалған құжаттар ұсынып, сүт өнімдерін өңдеуге бөлінген мемлекеттік қаржыны заңсыз алып отырған. Келтірілген залал көлемі 300 млн теңгеден асты.

Агенттік өкілдерінің айтуынша, шығындарды растау үшін жалған құжаттар ұсынылған. Онда жеке кәсіпкерлерден шикі сүт сатып алу және май өндіру туралы шындыққа жанаспайтын мәліметтер көрсетілген.

Казиноға жұмсалған қаражат

Заңсыз алынған субсидияның бір бөлігі — 110 млн теңге күдікті тарапынан казино ойындарына пайдаланылған.

Арест салынды

Күдікті үйқамаққа алынған. Сот шешімімен жалпы құны 300 млн теңгеден асатын зауытқа да арест қойылды. Тергеу амалдары жалғасуда.

Контекст

Еске салсақ, биыл көктемде Қарағандыда сүтке бөлінген субсидияны жымқыру дерегі бойынша бірнеше адамға сот үкімі шыққан еді. Олар әртүрлі мерзімге бас бостандығынан айырылған.