Президент Қасым-Жомарт Тоқаев Италияда өтетін XXV Қысқы Олимпиада және XIV Қысқы Паралимпиада ойындарына қатысатын ұлттық құрама мүшелерімен кездесіп, оларға салтанатты түрде Мемлекеттік туды табыстады, деп хабарлайды Zhaiyqmedia ақпарат агенттігі.
Мемлекет басшысы алдағы доданы дүниежүзінің ең мықты спортшылары бақ сынайтын айрықша маңызды оқиға деп атады. Оның айтуынша, бұл жаһандық бәсеке спортшылар үшін зор мүмкіндік әрі үлкен сынақ болмақ.
– Олимпиада ойындарына 40-қа жуық спортшымыз қатысады. Олар спорттың 10 түрінен жарысқа түседі. Ұлттық құрама мүшелерінің жартысынан көбі Олимпиадаға алғаш рет бара жатыр. Қысқы Олимпиадаға жолдама алу үшін спортшыларымыз көптеген белестен өтті. Түрлі халықаралық жарыста табысты өнер көрсетіп, 17 алтын, 31 күміс және 21 қола медальға ие болды, – деді Президент.
Сонымен қатар Қасым-Жомарт Тоқаев паралимпиадашыларға да ерекше сенім артатынын жеткізді. Қазіргі таңда олардың қоржынында 10 лицензия бар, алдағы уақытта бұл сан көбеюі мүмкін.
– Әрине, спортта жеңісті болжау мүмкін емес. Бірақ сіздер қатаң іріктеулерден сүрінбей өтіп, Қазақстанның олимпиадалық құрамасына мүше болдыңыздар. Осының өзі сіздердің әлеуеттеріңізді, жеңіске деген ұмтылыстарыңызды танытады. Тәуелсіздік алған уақыттан бері спортшыларымыз Қысқы Олимпиада ойындарында шеберлік танытып, бірнеше мәрте жеңіс тұғырынан көріне білді, – деді Мемлекет басшысы.
Президент өз сөзінде Владимир Смирнов, Людмила Прокашева, Елена Хрусталева, Денис Тен, Юлия Галышева сияқты Олимпиада жүлдегерлерінің есімдерін атап өтіп, олардың есімдері ел спортының тарихына алтын әріппен жазылғанын еске салды.
Фото: Ақорда
