Қазақстанда жекеменшік мектептерді ашу және олардың жұмысына қатысты талаптар күшейтілмек, енді лицензия тек орын тапшылығы бар, апатты немесе үш ауысымды мектептер орналасқан аймақтарға ғана беріледі, деп хабарлайды Zhaiyqmedia ақпарат агенттігі.
Оқу-ағарту министрлігі жаңа ережелерді таныстырды. Ондағы басты қағидат – мақсатқа сай болу. Яғни, жаңа білім ошақтарын кез келген жерде емес, нақты қажеттілік туындаған өңірде ғана ашуға рұқсат етіледі.
Сонымен қатар, жаңадан ашылатын жекеменшік мектептерде мемлекеттік тапсырысты орналастыруға мораторий енгізу жоспарланып отыр.
Тағы бір маңызды өзгеріс мектеп басшылығын тағайындау тәртібіне қатысты. Бұрын бұл мәселені тек мектеп құрылтайшысы шешсе, енді әрбір кандидатура Оқу-ағарту министрлігімен және жергілікті әкімдіктермен міндетті түрде келісіледі.
Жауапкершілік те күшейтілді. Енді мектеп құрылтайшылары оқушылардың білім сапасына, мұғалімдердің біліктілігіне және мектептегі қауіпсіздікке тікелей жауапты болады.
Бүгінгі таңда Қазақстанда лицензиясы бар 890 жекеменшік мектеп жұмыс істейді. Ведомство мәліметінше, олардың басым бөлігінің құжаттары цифрлық форматқа көшірілген.
Фото: Әлеуметтік желіден
