Батыс Қазақстан облысы Теректі ауданы Жаңа өмір ауылында заманауи дене шынықтыру-сауықтыру кешені пайдалануға берілді. Жоба «Самұрық-Қазына» қоры компаниялар тобы атынан «Samruk-Kazyna Trust» қорының қолдауымен жүзеге асырылды.

Ашылу салтанатына облыс әкімі Нариман Төреғалиев, «Самұрық-Қазына» АҚ басқарушы директоры Ғибрат Ауғанов, ауыл тұрғындары және мердігер компания мен спорт саласының өкілдері қатысты.

– Президент Қасым-Жомарт Тоқаев өз Жолдауларында ауыл әлеуетін арттыру, өңірлерді дамыту, тұрғындардың өмір сапасын жақсартуды басым бағыт ретінде атап өтеді. Бұл кешен – сол міндеттердің нақты нәтижесі. Соңғы үш жылда облыста 13 спорт нысаны пайдалануға берілсе, биыл 8 нысанның құрылысы жүріп жатыр. Оның алтауы жыл соңына дейін аяқталады, – деді өңір басшысы Нариман Төреғалиев.

Жалпы аумағы 1,6 мың шаршы метрді құрайтын екі қабатты, 100 орындық спорт кешенінде волейбол, баскетбол, бадминтон, үстел теннисі мен ұлттық күреске арналған алаңдар қарастырылған.

«Жаңа өмір ауылында ашылған бұл кешен – қор компаниялар тобы атынан республика көлемінде пайдалануға берілген 18-ші спорттық нысан. Қазіргі таңда осындай заманауи кешендер 740 мыңнан астам тұрғынның игілігіне қызмет етіп жатыр. Жаңа нысан ауыл тұрғындарының салауатты өмір салтын ұстануына серпін беріп, дене шынықтырумен тұрақты айналысуына барлық жағдайды жасайды деп сенеміз», – деді «Самұрық-Қазына» АҚ басқарушы директоры Ғибрат Ауғанов.