Украина президенті Владимир Зеленский АҚШ-пен жасалатын екіжақты қауіпсіздік кепілдіктері туралы тарихи келісімнің мәтіні толық дайын екенін мәлімдеді, деп хабарлайды Zhaiyqmedia ақпарат агенттігі.
Зеленскийдің айтуынша, бұл құжат соғыстың аяқталу мерзімін айқындап, Украинаға ғана емес, бүкіл Еуропаға тұрақтылық әкелуі мүмкін. Ол АҚШ-тың нақты кепілдік беруі аса маңызды екенін атап өтті.
«Украина үшін нақты қауіпсіздік кепілдіктері — осы соғыстың аяқталу күнін белгілейді. Бұл Украинадағы ғана емес, Еуропадағы ықтимал соғыстың да бітуіне жол ашады. Біз үшін ең бастысы — АҚШ тарапынан берілетін екіжақты қауіпсіздік кепілдіктері», — деді Украина президенті.
Ол келісім мәтіні толық әзірленгенін және енді тараптар оған қай жерде және қашан қол қоятынын анықтап жатқанын жеткізді.
«Біз серіктестерімізден құжатқа қашан және қай жерде қол қоятынымыз туралы нақты жауап күтіп отырмыз. Осыдан кейін келісім ратификациялау үшін АҚШ Конгресі мен Украинаның Жоғарғы Радасына жіберіледі», — деп толықтырды Владимир Зеленский.
Фото: Әлеуметтік желіден
