Жыл басынан бері Қазақстанда зейнетақы көлемі 10 пайызға артты, соның нәтижесінде орташа төлем 157 843 теңгеге жетті, деп хабарлайды Zhaiyqmedia ақпарат агенттігі.
Еңбек және халықты әлеуметтік қорғау министрлігінің 1 ақпандағы мәліметі бойынша, елімізде 2,5 миллионнан астам зейнеткер бар. Салыстыру үшін, өткен жылы орташа зейнетақы мөлшері 143 143 теңгені құраған болатын.
Жалпы төлем екі негізгі бөліктен тұрады: орташа ынтымақты зейнетақы – 103 931 теңге, ал орташа базалық зейнетақы – 53 912 теңге.
Базалық зейнетақы мөлшері азаматтың еңбек өтіліне тікелей байланысты. Оның ең төменгі мөлшері 35 596 теңгені (ең төменгі күнкөріс деңгейінің 70%-ы) құраса, ең жоғары шегі 60 005 теңгеге (ЕТКД-нің 118%-ы) дейін барады.
Мәселен, 10 жылға дейін еңбек өтілі барларға ең төменгі күнкөріс деңгейінің 70%-ы төленсе, 34 жылдан астам жұмыс істегендерге оның 118%-ы беріледі.
Фото: Әлеуметтік желіден
