Ресми дерек көздеріне сүйенсек, Венесуэла вице-президенті Дельси Родригес қазір Ресей аумағында жүр. Бұл ақпаратты Reuters агенттігі оның қозғалысынан хабардар төрт түрлі дереккөзге сілтеме жасап таратты.
Ал оның ағасы, Ұлттық ассамблея төрағасы Хорхе Родригес Каракаста қалып отыр. Бұл мәліметті үш басқа дереккөз растаған.
Бұл туралы Zhaiyqmedia.kz ақпарат агенттігі хабарлайды.
Жақында Дельси Родригес мемлекеттік телеарна арқылы аудиоүндеу жасап, ел президенті Николас Мадуро мен оның жұбайы Силия Флорес тірі екенін дәлелдеуді талап етті. Хорхе Родригес болса, шабуылдан кейін ешбір қоғамдық шараға қатыспаған.
Дельси Родригес кім және оның мемлекеттегі рөлі қандай?
56 жастағы Дельси Родригес – Венесуэланың қаржы және мұнай саласын қатар басқаратын, ел экономикасына ықпалы зор саяси қайраткер. Президент Мадуро оны 2018 жылы вице-президент етіп тағайындаған. Ол – Каракаста дүниеге келген, солшыл бағыттағы революционер Хорхе Антонио Родригестің қызы.
Мадуро оны «батыр, тәжірибелі, күресте шыңдалған әйел» деп сипаттайды. Ал биыл, АҚШ санкциялары күшейген тұста, Дельси Родригеске мұнай саясатына тікелей жетекшілік жасау жүктелді.
АҚШ шабуылына әлем қалай жауап берді?
Қытай Сыртқы істер министрлігі Вашингтонның іс-әрекетін өткір сынға алып, Венесуэла тәуелсіздігіне қол сұғылғанын мәлімдеді. Министрлік өкілдерінің айтуынша, бұл – Латын Америкасы мен Кариб өңіріндегі бейбітшілікке қауіп төндіретін, халықаралық құқықты аяққа таптаған әрекет.
Қытай тарапы АҚШ-ты Біріккен Ұлттар Ұйымының Жарғысына сай келетін халықаралық нормаларды ұстануға және басқа мемлекеттердің егемендігіне құрметпен қарауға шақырды.
Испан тілі маманы және журналист Екатерина Базанова қазіргі жағдайда Венесуэладағы биліктің бейбіт ауысуы қиын екенін алға тартады. Оның сөзінше, АҚШ Мадуроны тек диктатор емес, есірткі картелінің басшысы ретінде көрсетуге тырысуда. Бұл ішкі аудиторияға әскери араласудың негізін түсіндіру үшін қажет болуы мүмкін.
Оппозиция мәселесіне тоқталған Базанова: «Қарсылық көрсетуге болар еді, бірақ халықтың көпшілігі азық-түлікке тәуелді болғанда, бірде-бір оппозициялық тұлға айналасына жеткілікті қолдау жинай алмайды» – деді.
Оппозиция қатары да үнсіз емес. Нобель сыйлығының лауреаты, саясаткер Мария Корина Мачадо X желісінде мәлімдеме жасап, Венесуэланың «еркіндікке шыққанын» хабарлады. Мачадо билікке келген соң саяси тұтқындар босатылады деп сендірді.
Оның ойынша, елді басқаруды былтыр өткен сайлауда Мадуромен бәсекелес болған Эдмундо Гонсалес қолына алуы керек. Оның жақтастары өткен сайлауды Мадуро бұрмалады деп есептейді.
