сурет:abai.kz

Ұлт деген – жай ғана бір тілде сөйлейтін адамдар тобы емес. Ұлт – ортақ тағдыр, ортақ жады, ортақ мінез. Оны ұлт ететін нәрсе – рух. Рухсыз халық – тек сандық көрсеткіш.

Ұлтты ұлт ететін ең әуелі – тіл. Тіл – ойдың киімі, сана айнасы. Өз тілін менсінбеген халық өз ойын да толық айта алмайды, ал ойын айта алмаған жұрт өз тағдырын жасай алмайды. Қазақ тілін сақтау – тарихты, дүниетанымды, болашақты сақтау.

Екінші күш – мәдениет пен дәстүр. Әлем өзгеріп жатыр, бірақ дәстүрсіз жаңғыру болмайды. Тойдың сәнімен емес, ойдың тереңімен ұлт сақталады. Дәстүр – бұл өткеннің көлеңкесі емес, болашақтың іргетасы.

Үшіншісі – жер мен елге адалдық. Туған жерге құрмет пен жауапкершілік – нағыз патриотизмнің өлшемі. Ұлтты ұлт ететін де, ұлтты құтқаратын да – өз еліне жанашыр адам.

Қазақ халқы талай тарихи дауылдан аман қалды. Себебі оның өзегінде рух бар еді. Бүгін сол рухты жаңғырту – біздің парыз. Ұлттың болашағы – байлықта, билікте емес, ұлтты ұлт ететін қасиеттерді сақтай алуда.

Ұлттың жаны – тілінде, ары – дәстүрінде, күші – бірлігінде. Осы үшеуі бар ел ешқашан жоғалмайды.

Автор: Бердалы Ораз