Түркия биыл қорғаныс пен авиация саласындағы экспорты арқылы жаңа межені бағындырды. Ресми деректерге сүйенсек, 2025 жылы бұл саладағы шетелге тауар мен қызмет жеткізу көлемі 10,054 млрд долларға жеткен.
Бұл көрсеткіш 2024 жылмен салыстырғанда шамамен 48% артық. Бұл үдеріс әсіресе әскерилік жаңа келісімшарттардың көлемі артқан тұста байқалады – олар 17,8 млрд долларға дейін көбейіп, 78% өсім көрсетті.
Бұл туралы Zhaiyqmedia.kz ақпарат агенттігі хабарлайды.
Түркия қорғаныс өнеркәсібі басқармасының басшысы Халук Гёргюннің айтуынша, желтоқсан айының өзінде 2,5 млрд долларға өнім экспортталып, жеке айлық рекорд орнатылды. Экспорттың 9,87 млрд доллары өнімдер, ал 184 млн доллары қызметтер үлесіне тиесілі.
Түркия әскери техника мен ұшақ жеткізуде қандай елдермен жұмыс істеп жатыр?
Былтыр Түркия Португалияға әскери кеме, Испанияға HÜRJET оқу ұшағы, Индонезияға KAAN үлгісіндегі техника жеткізу бойынша келісімдер жасасты. Сондай-ақ Румыниямен ашық теңіз кемелері бойынша, ал Парсы шығанағы мен Африка елдерімен ұшқышсыз ұшу аппараттары және оқ-дәрі жеткізу жөнінде мәмілелерге қол қойылды.
Жалпы экспорттың 56%-ы немесе 5,6 млрд доллары Еуроодақ, НАТО мүшелері және АҚШ елдеріне тиесілі. Қалған бөлігі Азия-Тынық мұхиты, Таяу Шығыс және Африка аймақтарына бөлінген.
Қазақстан үшін нені аңғаруға болады?
Түркияның қорғаныс нарығындағы жетістігі аймақтық серіктестер, соның ішінде Қазақстан үшін де маңызды. Себебі, Түркия қазіргі таңда әскери технологияларды ортақ жобалар аясында бөлісуге дайын мемлекеттердің бірі болып саналады. Бұл қазақстандық қорғаныс-өнеркәсіптік кешен үшін серпінді ынтымақтастыққа жол ашуы мүмкін.
Айта кетейік, 2022 жылы Түркия бұл салада 4,4 млрд долларлық экспорт жасап, жалпы елдік өнім экспортындағы үлесі небәрі 1,7% болған. Ал бүгінде бұл көрсеткіш 3,7%-ға жетіп отыр, бұл – саладағы дамудың нақты көрсеткіші.
