АҚШ президенті Дональд Трамп Иранмен сауда жасайтын елдерге қатысты екінші деңгейлі санкциялар енгізу туралы жарлыққа қол қойды, бұл шешім Қазақстанның сыртқы саудасына айтарлықтай қысым жасауы мүмкін, деп хабарлайды Zhaiyqmedia ақпарат агенттігі.
Жаңа шектеулерге сәйкес, Америка Құрама Штаттары Иранмен сауда-саттық жүргізетін кез келген мемлекеттің тауарларына 25 пайыздық кедендік баж салығын енгізеді. Бұл ең алдымен Қазақстанның сауда және транзит саласы үшін үлкен кедергі тудырады.
Қазақстан Иранмен Каспий теңізі және «Солтүстік – Оңтүстік» көлік дәлізі арқылы тығыз экономикалық байланыс орнатқан. Еліміз бұл бағыт арқылы дәнді дақылдар, азық-түлік, ауыл шаруашылығы өнімдері мен құрылыс материалдарын тасымалдайды. Осы тауарлар Иран арқылы Парсы шығанағы, Солтүстік Африка және Оңтүстік Азия елдерінің нарығына шығарылады.
Жаңа санкциялар қазақстандық компаниялардың Иранмен жұмысын айтарлықтай қиындатады. Бұл өз кезегінде бірқатар маңызды экспорттық-транзиттік жобалардың тоқтап қалуына немесе баяулауына әкеп соғуы ықтимал.
Сонымен қатар, қазақстандық банктер Иранмен жасалатын қаржылық операцияларды бұғаттауға мәжбүр болуы мүмкін. Бұл доллармен есеп айырысуды тоқтатып, сауданы бартер немесе үшінші елдер арқылы өтетін балама схемаларға көшіру қажеттігін тудырады. АҚШ-тың 25 пайыздық баж салығы осындай себептермен Иранмен жұмыс істейтін қазақстандық бизнестің шығынын көбейтеді.
Фото: Әлеуметтік желіден
