АҚШ президенті Дональд Трамп Жоғарғы соттың шешімінен кейін бір тәулік өткен соң, әлем елдері үшін импорттық баж салығын 10%-дан 15%-ға дейін көтерді, деп хабарлайды Zhaiyqmedia ақпарат агенттігі.
Дональд Трамп бұл шешімін өзінің Truth Social әлеуметтік желісінде жариялады.
«Кеше АҚШ Жоғарғы соты бірнеше ай ойланып, ақыры абсурд, сауатсыз әрі Америкаға қарсы шешім шығарды. Мен, Америка Құрама Штаттарының президенті, осыған байланысты әлемдік тарифті 10%-дан 15%-ға дейін дереу көтеретінімді растаймын. Онжылдықтар бойы АҚШ-ты жазасыз тонап келген (менің басқаруыма дейін!) көптеген елге қатысты бұл шешім толық заңды. Алдағы айларда Трамп әкімшілігі „Американы қайтадан ұлы етейік“ атты сәтті бағдарламамызды жалғастыратын жаңа, заңды тарифтерді енгізеді. БҰРЫН-СОҢДЫ БОЛМАҒАНДАЙ ҰЛЫ ЕТЕМІЗ!!!» — деп жазды АҚШ президенті.
Бұған дейін АҚШ-тың Жоғарғы соты президент әкімшілігінің халықаралық төтенше жағдайлар кезіндегі экономикалық өкілеттіктер туралы заңды сылтауратып, басқа елдерге қарсы импорттық баж салығын енгізуін «өз өкілеттігін асыра пайдалану» деп таныған болатын. Алайда сот инстанциясы бұған дейін төленген салықтардың қайтарылуы керек пе, жоқ па, оны нақтыламады.
