АҚШ пен Иран арасындағы шиеленіс ушығып тұрғанда, Түркия президенті Режеп Тайып Ердоған екі тарапты Анкарада келіссөз үстеліне отырғызу үшін делдал болуға кірісті. АҚШ президенті Дональд Трамп бұл ұсынысқа алдын ала келісімін берген, деп хабарлайды Zhaiyqmedia ақпарат агенттігі.
Бұл туралы Түркияның беделді Hürriyet басылымы жазды. Газеттің мәліметінше, Ердоған мен Трамп телефон арқылы сөйлескен кезде Түркия басшысы Иран, АҚШ және Түркия өкілдерінің қатысуымен үшжақты кездесу өткізуді ұсынған. Басылым бұл жаңалықты «Келіңіздер, кездесейік» деген тақырыппен жариялаған.
«Түркия президенті үш елдің әскери және қауіпсіздік саласындағы сарапшыларының басын қосатын жиын өткізуді ұсынды. Режеп Тайып Ердоған Анкарада Дональд Трамп пен Иранның ықтимал өкілі Масуд Пезешкианды қабылдауға дайын екенін жеткізді», – делінген газет материалында.
Бұл дипломатиялық қадамдардың аясында Иран Сыртқы істер министрінің орынбасары Аббас Аракчидің жақын күндері Анкараға сапармен келуі мүмкін екені де айтылады.
Сарапшылар мұны соғыс қаупін сейілтуге бағытталған маңызды дипломатиялық қадам деп бағалап отыр. Бұл АҚШ пен Иранның тікелей болмаса да, бір үстел басына отыруға дайын екенін аңғартады. Келіссөз алаңы ретінде Анкараның таңдалуы кездейсоқ емес. Түркия – НАТО мүшесі бола тұра, Иранмен де, АҚШ-пен де тығыз байланыс орнатқан санаулы елдің бірі. Осылайша, Түркия өзін аймақтағы бітімгер және маңызды геосаяси ойыншы ретінде көрсеткісі келеді.
Фото: Әлеуметтік желіден
