Мемлекет басшысы Қасым-Жомарт Тоқаев Алматыға жұмыс сапары аясында әл-Фараби атындағы Қазақ ұлттық университетінің ғылыми әлеуетімен танысты, деп хабарлайды Zhaiyqmedia ақпарат агенттігі.
ҚазҰУ басқарма төрағасы – ректоры Жансейіт Түймебаев Президентке Farabi Hub инновациялық өнімдер мен жоғары технологиялық жобалар орталығын таныстырды.
Бұл хаб – инновациялық әзірлемелерді экономиканың нақты секторына енгізуге арналған заманауи платформа. Оның базасында креативті индустрия, жасанды интеллект және стартаптар саласындағы жобалар іске асырылады. Орталық жұмысының нәтижесінде 300 жаңа жұмыс орны құрылып, 20 миллион доллардан астам инвестиция тартылған.
Орталықта ZTE, BASF, Binlin сияқты технологиялық корпорациялардың, сондай-ақ бірқатар жетекші шетелдік ғылыми ұйымдардың зерттеу алаңдары орналасқан. Бұдан бөлек, мұнда ҚазҰУ-дың ғылыми-зерттеу институттары да жұмыс істейді.
Фото: Әлеуметтік желіден
