Президент Қасым-Жомарт Тоқаев Волонтерлер форумында сөз сөйлеп, отандық кәсіпкерлерге үндеу тастады. Ол мемлекет ұлттық буржуазияны қолдайтынын, бірақ бизнес те халыққа қамқорлық көрсетуге міндетті екенін жеткізді, деп хабарлайды Zhaiyqmedia ақпарат агенттігі.
Мемлекет басшысы тарихта бай-қуатты азаматтардың қоғам дамуына зор үлес қосқанын еске салды. Олар білім беру ісі мен ағартушылық жобаларға белсенді демеушілік жасап, ұлттың өркендеуіне атсалысқан.
«Мемлекет ұлттық буржуазияны қолдайды, ал кәсіпкерлер өз кезегінде халыққа қамқор болуы керек», – деді Президент.
Сонымен қатар Тоқаев бизнесті корпоративтік волонтерлікті белсенді дамытуға шақырып, мемлекет қоғамдық қажеттіліктерге бей-жай қарамайтын кәсіпкерлерді әрдайым қолдайтынын баса айтты.
Осы орайда ол қайырымдылық және әлеуметтік жауапкершілік саласында ерекше көзге түскен бизнесмендерді марапаттау үшін биыл тағайындалған «Мейірім» ордені туралы да айтып өтті.
Фото: Әлеуметтік желіден
