Қазақстанның Сыртқы істер министрлігі Таяу Шығыстағы жағдайдың шиеленісуіне және Иранға қатысты соңғы оқиғаларға байланысты ресми үндеу жариялады, деп хабарлайды Zhaiyqmedia ақпарат агенттігі.
Ведомство соңғы қайғылы оқиғалар салдарынан қаза тапқан бейбіт тұрғындарға, оның ішінде балаларға және Иран Ислам Республикасының жоғары басшылық өкілдеріне байланысты Иран халқына көңіл айтты.
«Соғысқа қатысы жоқ араб мемлекеттерінің азаматтық нысандарына жасалған соққыларға өкініш білдіреміз. Қазақстан бұл елдермен достық пен жан-жақты ынтымақтастықты дамытып келеді. Халықаралық гуманитарлық құқық нормаларын сақтау қақтығыстар кезінде азаматтық нысандар мен бейбіт халықты ерекше қорғауды талап етеді», – делінген хабарламада.
Сондай-ақ Қазақстан халықаралық гуманитарлық құқыққа саяси бейілділікті күшейту жөніндегі жаһандық бастаманың негізін қалаушылардың бірі екені және қарулы қақтығыстар кезінде адамгершілікті сақтаудың маңыздылығын әрдайым қолдайтыны атап өтілді.
«Біз халықаралық даулар мен қақтығыстарды халықаралық құқық пен БҰҰ Жарғысының нормаларын мүлтіксіз сақтай отырып, тек саяси-дипломатиялық жолмен реттеу қажеттігі туралы қағидатты ұстанымымыздың өзгермейтінін растаймыз», – деп хабарлады ведомство.
Сыртқы істер министрлігі барлық тарапты аймақтағы зорлық-зомбылықтың одан әрі өршуіне жол бермеу үшін барынша ұстамдылық пен жауапкершілік танытуға шақырды.
Фото: Әлеуметтік желіден
