Қазақстанның бірінші ракеткасы Елена Рыбакина Индиан-Уэллс турнирінің жартылай финалына шығып, мансабында алғаш рет әлемнің екінші ракеткасы атанатын болды, деп хабарлайды Zhaiyqmedia ақпарат агенттігі.
Ширек финалда қазақстандық теннисші америкалық Джессика Пегуланы екі сетте жеңді. Кездесу 6:1, 7:6 есебімен Рыбакинаның пайдасына аяқталды.
Бұл жеңіс оған WTA рейтингінде польшалық теннисші Ига Швёнтекті басып озуға мүмкіндік берді. Осылайша, Рыбакина жаңартылған рейтингте екінші сатыға көтеріледі.
Бұған дейін спортшының осы маусымдағы басты мақсаты – әлемнің бірінші ракеткасы атану екені белгілі болған. Ол осы мақсат жолында Билли Джин Кинг кубогының матчтарына қатыспайтынын мәлімдеген еді.
Сондай-ақ Индиан-Уэллс турнирінде тағы бір қазақстандық теннисші Анна Данилина жұптық сында финалға шығып, жанкүйерлерді қуантты.
Фото: Әлеуметтік желіден
