Атырау қаласына қарасты Дамбы ауылдық округінде қала күні қарсаңында 200 орындық жаңа мәдениет үйі пайдалануға берілді. Салтанатты шараға қала әкімі Шәкір Кейкин қатысып, нысанның кілтін табыс етті.
Жаңа мәдениет ошағының аумағы толықтай абаттандырылып, ғимарат ішінде акт залы, кітапхана және түрлі үйірмелерге арналған жеке кабинеттер қарастырылған.
– Тұрғындарды жаңа мәдениет нысанының ашылуымен құттықтаймын. Ескі ғимарат Кеңес дәуірінде салынғандықтан қазіргі талапқа сай емес еді. Жаңа нысанда ауылдың өнерпаздары мен жас таланттары халықтың рухани баюына үлес қосады деп сенемін. Қалаға салынып жатқан әлеуметтік нысандар ауылдарда да бой көтеруі керек. Сол арқылы өркениет пен мәдениетті қалыптастырамыз, – деді Шәкір Кейкин.
Қала әкімдігінің хабарлауынша, қала күні аясында Алмалы ауылында да осындай мәдениет үйі пайдалануға беріледі. Бұдан бөлек, Атырауда 200 орындық, Тасқала ауылында 300 орындық мәдени ғимараттың құрылысы жүріп жатыр.
