Сурет: Egemen Qazaqstan
Денсаулық сақтау министрлігі Үлкен Шабақты көліндегі судың сапасын зерттеу нәтижелерінің алғашқысын жариялады. Бұған дейін Көкшетау тұрғыны әлеуметтік желіде Бурабайда демалған соң отбасы мүшелерінің терісінде бөртпелер пайда болғанын жазған еді, деп хабарлайды Zhaiyqmedia.kz ақпарат агенттігі.
Әйелдің айтуынша, кішкентай ұлы қатты зардап шегіп, дәрігерлер оған буллезді дерматит диагнозын қойған. Ұқсас белгілер анасы, әкесі және әжесінде де байқалған. Оның анасы тек Үлкен Шабақты көліне ғана түскенін атап өткен.
Осыдан кейін мамандар көлден 6 су сынамасын алып, санитариялық-химиялық, микробиологиялық және паразитологиялық көрсеткіштер бойынша зерттеу жүргізген. Министрліктің мәліметінше, паразитологиялық талдау қорытындысы бойынша ешқандай сәйкессіздік анықталмаған. Ал санитариялық-химиялық және микробиологиялық зерттеулер әлі жалғасып жатыр.
Қазіргі уақытта сараптама нәтижелері толық дайын болмағандықтан, мамандар қорытындыны кейінірек жариялайтынын хабарлады.
