Президент Қасым-Жомарт Тоқаев Азия даму банкінің (АДБ) президенті Масацугу Асакавамен кездесіп, екіжақты ынтымақтастықты одан әрі кеңейту мәселелерін талқылады, деп хабарлайды Zhaiyqmedia ақпарат агенттігі.
Ақордада өткен кездесуде Тоқаев АДБ-ның алдағы 60 жылдық мерейтойымен құттықтады. Ол 30 жылдан астам уақыт ішінде банктің Қазақстанда жалпы құны 7 миллиард доллардан асатын 170-тен астам жобаны қолдағанын еске салды. Бұл қаражат ел экономикасының өсіміне, инфрақұрылымды жаңғыртуға және халықтың әл-ауқатын арттыруға елеулі үлес қосты.
Мемлекет басшысы Қазақстанның экономикадағы маңызды секторларда ірі жобаларды іске асыруды жоспарлап отырғанын айтты. Бұл бастамалар елдің орнықты дамуын қамтамасыз етіп, құрылымдық реформаларды жеделдетуге бағытталған.
Масацугу Асакава өз кезегінде банктің Қазақстанмен серіктестікті нығайтуға мүдделі екенін атап өтті.
«Азия даму банкі Қазақстанмен ынтымақтастық аясын кеңейтуді басым бағыт санайды. Біз тұрғын үй құрылысы, төтенше жағдайларды басқару және басқа да маңызды стратегиялық жобаларды қаржыландыруға дайынбыз», – деді АДБ басшысы.
Сонымен қатар, банк президенті Қазақстанның цифрлық технологиялар мен жасанды интеллектіні енгізудегі жетістіктерін жоғары бағалады. Ол аса маңызды минералдар секторын дамытуда және ірі инвестициялық жобаларды жүзеге асыруда зор әлеует барын жеткізді.
Фото: Әлеуметтік желіден
