Солтүстік Қазақстан облысындағы ауылда жаңа өрт сөндіру бекеті ашылғанына бір ай болса да, жергілікті тұрғынның үйі толық жанып кетті. Құтқарушылар оқиға орнына 45 шақырым жердегі облыс орталығынан жетуге мәжбүр болған, деп хабарлайды Zhaiyqmedia ақпарат агенттігі.
Оқиға Қызылжар ауданына қарасты Большая Малышка ауылында болған. Желіде тараған ақпаратқа сәйкес, бір ай бұрын осы елді мекенде өрт сөндіру пункті салтанатты түрде ашылған.
Алайда тұрғын үйден өрт шыққан кезде бұл бекеттен ешқандай көмек болмаған. Өрт сөндіру тобы 45 шақырымдық қашықтықты шамамен бір сағатта еңсеріп келген. Олар жеткенше, баспанадан күл ғана қалған.
Қоғам белсенділері жаңадан құрылған өрт сөндіру бөлімшесінің іс жүзінде жұмыс істемейтінін, тек қағаз жүзінде ғана бар екенін айтып дабыл қағуда.
Фото: Әлеуметтік желіден
