Олимпиада чемпионы, танымал боксшы Серік Сәпиев еліміздегі Конституциялық реформалар жобасының қоғамдық талқылауына қатысты өз ойын білдірді, деп хабарлайды Zhaiyqmedia ақпарат агенттігі.
Құрметті достар! Елімізде Конституциялық реформа жобасы кеңінен талқыланып жатыр. Бұл – алдағы онжылдықта Қазақстанның мемлекеттік құрылымы қандай болатынын және еліміздің қалай дамитынын анықтайтын маңызды әрі жауапты кезең.
Мен Қазақстан азаматы, қоғам қайраткері және жеке тұлға ретінде ұсынылып отырған бастамалардың маңызын терең түсінемін әрі мемлекеттілікті дәйекті түрде жаңарту мен нығайту бағытын қолдаймын.
Біз 2022 жылы Әділетті Қазақстанды құру бағытын ұстанып, ауқымды өзгерістер жолына түстік. Бүгінгі реформа – сол өзгерістердің заңды жалғасы, оларды тереңдету мен дамыту. Бұл кенеттен жасалған бұрылыс емес, мемлекеттің тұрақтылығын арттырып, қоғам сенімін күшейтуге бағытталған сарабдал процесс.
Қарапайым тілмен айтсақ, реформалардың келесі кезеңі – азаматтардың мүддесін білдіретін институттардың рөлін күшейту. Спортшы ретінде мен жақсы білемін: нағыз күш – тәртіпте, командалық жұмыста және ережелерді құрметтеуде. Мықты мемлекеттің негізінде де осы қағидаттар жатыр. Жеңіске бір күнде жету мүмкін емес – ол үшін сабыр, дайындық және бірлік қажет. Дәл осындай тәсіл бүгінде мемлекет құрылысында да ұсынылып отыр.
Президенттің сөзбен емес, күнделікті адал еңбекпен көрінетін жауапты әрі жасампаз патриотизмге баса назар аударғаны аса маңызды. Мен үшін және еліміздің барлық спортшысы үшін бұл нақты жұмысты білдіреді: бұқаралық спортты дамыту, жас таланттарды қолдау, спорт пен салауатты өмір салты әрбір бала мен әр отбасы үшін қолжетімді болатындай жағдай жасау.
Қоғамдық талқылаудың маңызын ерекше атап өткім келеді. Реформалар диалогсыз мүмкін емес. Әрбір азаматтың пікірі маңызды және ескерілуі тиіс. Осылай ғана біз шын мәнінде ел мүддесіне қызмет ететін шешімдерге келе аламыз.
Ұсынылған бастамалар мемлекеттілігімізді, егемендігімізді нығайтып, болашақ ұрпақ үшін жаңа мүмкіндіктер ашатынына сенімдімін. Бұл – тұрақты дамудың, сабақтастықтың және ұлттық бірліктің жолы. Сенімге, еңбекке және өзара құрметке сүйене отырып, біз бірге мықты, әділетті және табысты Қазақстанды құрамыз.
Фото: Әлеуметтік желіден
