Сурет: Egemen Qazaqstan
«Қазақмыс» компаниялар тобы Жезқазған өндірістік алаңын жаңғыртудың ауқымды бағдарламасын іске асыруда, деп хабарлайды Zhaiyqmedia.kz ақпарат агенттігі.
Компания иесі Нұрлан Артықбаев ҚР Өнеркәсіп және құрылыс министрі Ерсайын Нағаспаевпен бірге Жезқазған өндірістік алаңының негізгі нысандарын аралады. Сапар барысында инвестициялық жобалардың нәтижелері, өндіріс тиімділігін арттыру, өнеркәсіптік қауіпсіздік, экологиялық жаңғырту және өндірістік қуатты дамыту мәселелері талқыланды.
Жезқазған мыс балқыту зауытына ерекше көңіл бөлінді. Басшылыққа жабдықты күрделі жөндеу және жаңғырту жобалары таныстырылды. Экологиялық жаңғырту аясында зауытта, «Қазкат» зауытында және байыту фабрикаларының сүзгілеу-кептіру бөлімшелерінде құны шамамен 4 млн доллар болатын газдандыру жобасы толық аяқталды. Жоба бойынша 20 өндірістік нысан пайдалануға беріліп, жабдық мазуттан табиғи газға көшірілді.
Нәтижесінде мыс балқыту зауытында парниктік газ шығарындылары 11,79%-ға, ал сүзгілеу-кептіру бөлімшелерінде шамамен 80%-ға төмендеді. Жобаның жылдық экономикалық тиімділігі шамамен 4 млрд теңгеге бағалануда.
Сондай-ақ перспективалық жобалар таныстырылды, оның ішінде құны 200 млн доллар болатын жаңа күкірт қышқылы цехының құрылысы бар. Бұл күкірт диоксиді шығарындыларын екі еседен астам қысқартып, өндірісті заманауи экологиялық стандартқа сәйкестендіреді.
Тағы бір басым бағыт – қуаты 35 МВт газпоршеньді электр станциясын салу. Инвестиция көлемі 24,8 млн еуроны құрайды. Жоба кәсіпорынның энергетикалық тәуелсіздігін арттырып, жыл сайын шамамен 5,5 млрд теңге үнемдеуге мүмкіндік береді.
Делегация №1, №2 және №3 Жезқазған байыту фабрикаларына барып, технологиялық жабдықты жаңғырту, шикізатты өңдеу тиімділігін арттыру және өндірістік инфрақұрылымды дамыту мәселелерін қарады.
Сапар қорытындысында Нұрлан Артықбаев Жезқазған өндірістік алаңын жаңғырту компания дамуының стратегиялық бағыты екенін атап өтті. Ол өндіріс, экология, қауіпсіздік және технологиялық жаңартуға инвестиция салу жалғасатынын жеткізді.
