Шымкентте ірі көлемде алаяқтық жасады деген күдікпен әйел адам ұсталды. Тергеуге сәйкес, күдікті азамат бірнеше рет алдау арқылы жалпы сомасы 80 миллион теңгеден асатын шығын келтірген, деп хабарлайды Zhaiyqmedia ақпарат агенттігі.
Полицияның мәліметінше, алғашқы оқиға зергерлік бұйым саудасымен айналысатын кәсіпкер әйелге қатысты болды. Күдікті оның сеніміне кіріп, қымбат алтын бұйымдарды алғанымен, кейін өз уәдесін орындамаған.
«Күдікті әйел танысының сенімін пайдаланып, алдау арқылы бағалы бұйымдарды иемденіп кеткен. Алайда алған мүлікті қайтармады және келісілген шарттарды орындаған жоқ», – деді тәртіп сақшылары.
Екінші дерек шетелге туристік сапарлар ұйымдастыруға байланысты. Тергеу нұсқасы бойынша, күдікті тиімді демалыс уәде беріп, алдын ала төлемдер алған, бірақ саяхаттарды ұйымдастырмаған.
Осы әрекеттері үшін ол халықаралық іздеуге жарияланып, арнайы операция нәтижесінде ұсталып, уақытша ұстау изоляторына қамалды.
Қазіргі таңда полиция күдіктінің басқа да қылмыстарға қатысы бар-жоғын анықтап жатыр.
Фото: Әлеуметтік желіден
