Қытайда Мьянма аумағында астыртын казино мен алаяқтық орталықтар желісін басқарған қылмыстық топтың 11 мүшесіне қатысты өлім жазасы орындалды, деп хабарлайды Zhaiyqmedia ақпарат агенттігі.
29 қаңтарда Қытай Халық Республикасында «Мин» синдикатының басшыларына қатысты шығарылған өлім үкімі іске асырылды. Бұл топ Мьянмадағы алаяқтық орталықтар мен астыртын казинолар желісін басқарып, ірі көлемде қаржы жымқырған.
Тергеу мәліметтеріне сәйкес, олардың қылмыстық әрекеттерінен келген шығын көлемі 1,4 миллиард доллардан асқан. Сонымен қатар, синдикат мүшелерінің Қытайдың 14 азаматын өлтіргені дәлелденді.
Өлім жазасына кесілгендердің арасында топ негізін қалаушының ұлы мен немересі де бар. Ал синдикаттың негізгі жетекшісі полицияға қолға түсер кезде өз-өзіне қол жұмсаған.
Сотталғандардың апелляциялық шағымы өткен жылдың қараша айында қабылданбаған болатын. Сот үкімі түпкілікті және қайта қарауға жатпайды.
Фото: Әлеуметтік желіден
