Казталов ауданында «Заң мен тәртіп» қағидаты аясында «Құқықтық мәдениет» апталығы ұйымдастырылды. Апталықтың негізгі мақсаты – жас ұрпақтың заңға деген құрметін арттыру, құқықтық сауаттылығын дамыту және құқық бұзушылықтың алдын алу болып табылады.

Іс-шаралар аудан бойынша 20 жалпы орта білім беретін мектепте өткізілді. Апталық барысында ашық сабақтар, пікірталастар мен дөңгелек үстелдер ұйымдастырылып, оқушыларға заң талаптарын сақтау мен азаматтық жауапкершіліктің маңызы түсіндірілді.

Сонымен қатар, полиция қызметкерлері оқушылармен кездесу өткізіп, өз қызметтерінің ерекшелігі, құқық бұзушылықтың алдын алу жолдары және кәмелетке толмағандардың жауапкершілігі туралы жан-жақты мағлұмат берді. Кездесулер барысында балалар өздерін қызықтырған сұрақтарға жауап алды.

Мұндай шаралар жасөспірімдердің құқықтық мәдениетін қалыптастырып, олардың қоғамдағы өз орнын дұрыс түсінуге ықпал етеді. Құқықтық сауаттылығы жоғары ұрпақ – елдің ертеңгі тұрақтылығы мен дамуының кепілі.