Қазақстанда мектеп оқулықтарын жаңарту бойынша ауқымды жұмыстар жоспарланып отыр, бұл үдеріс бірнеше жылға созылады, деп хабарлайды Zhaiyqmedia ақпарат агенттігі.
Бұл туралы Оқу-ағарту министрі Жұлдыз Сүлейменова мәлімдеді. Оның айтуынша, оқу-әдістемелік кешендерді ауыстыру кезең-кезеңімен іске асады.
Жоспарға сәйкес, алғашқы өзгерістер 2026 жылы басталады. Бұл жылы 3, 4, 7, 8 және 9-сыныптарға арналған оқулықтар жаңартылады.
Ал 2027 жылы 1 және 5-сынып оқушылары толықтай жаңа оқулықтармен қамтылады. Осы кезеңде карталар, тарихи және әкімшілік материалдар сияқты қосымша құралдар да толық ауыстырылады. Сондай-ақ жоғары сыныптардың, яғни 10-11 сыныптардың оқулықтары қайта қаралатын болады.
Жаңартудың соңғы кезеңі 2028 жылға жоспарланған. Бұл кезде 2 және 6-сыныптар үшін жаңа оқулықтар шығарылады.
Фото: Әлеуметтік желіден
