Тексеру барысында кір жуғыш ұнтақ салынған қаптаманың ішінен 11 телефон, 37 құлаққап, смарт-сағат, адаптер, 3 флеш-карта, 13 USB шнуры табылды.

ҚР ІІМ Ұлттық ұланының әскери қызметшілері мен БҚО бойынша қылмыстық-атқару жүйесі департаментінің № 28 түзету мекемесі қызметкерлерінің қырағылығы мен жедел іс-қимылы нәтижесінде күзетілетін аумаққа тыйым салынған заттарды өткізу әрекетінің жолы кесілді.

ҚР ІІМ Ұлттық ұланының баспасөз қызметінен мәлім еткеніндей, жоспарлы тексеріс кезінде рентген құрылғысының көмегімен әскери қызметшілер тыйым салынған заттардың жасырылғанын анықтады.

Аталған заң бұзушылықты 5517-әскери бөлімінің бақылаушы маманы, сержант Жаннат Халилова байқады.

— Тексеру барысында кір жуғыш ұнтақ салынған қаптаманың ішінен 11 ұялы телефон, 7 жұп сымсыз құлаққап, 30 сымды құлаққап, 1 смарт-сағат, флеш-картаға арналған 1 адаптер, 3 флеш-карта, 13 USB шнуры, 4 қуаттағыш құрылғы табылды. Оған қоса қызыл түсті ерекше иісі бар сұйықтық құйылған бір құты бойынша сараптама тағайындалды. Қазіргі кезде бұл дерек бойынша тексеру жүргізіліп жатыр, — деп хабарлады ведомстводан.

Еске сала кетейік, бұдан бұрын Оралда 13 жастағы қызды соққыға жыққан жасөспірімдер ұсталғанын жазған едік.