Қазақстанда 14-16 ақпан аралығында ауа райы тұрақсыз болады, еліміздің оңтүстігі мен оңтүстік-шығысында қатты жауын-шашын күтіледі. Республика бойынша жел күшейіп, көктайғақ болып, тұман түседі, деп хабарлайды Zhaiyqmedia ақпарат агенттігі.
«Қазгидромет» РМК мамандарының болжамынша, 14 ақпанда антициклонның әсерінен Қазақстанның басым бөлігінде күн жауын-шашынсыз болады.
Алайда 15 ақпаннан бастап еліміздің батысына солтүстік-батыстан циклон жылжи бастайды. Ол шығысқа қарай жылжып, артынан жаңбыр мен қар әкеледі. Сонымен қатар бұрқасын соғып, ауа температурасы біртіндеп жоғарылайды.
Ал Қазақстанның оңтүстігі мен оңтүстік-шығысында осы күндері ауа райы құбылмалы болады. Оңтүстік циклонның ықпалымен атмосфералық фронттар өтетіндіктен, жауын-шашын (жаңбыр, қар) күтіледі. Әсіресе 14-15 ақпанда еліміздің бұл аймақтарында нөсерлі жауын мен қалың қар жаууы мүмкін.
«Жалпы республика бойынша желдің күшеюі, көктайғақ пен тұман сақталады», – деп ескертті синоптиктер.
Фото: Әлеуметтік желіден
