Агроөнеркәсіптік кешен – елдің азық-түлік қауіпсіздігін қамтамасыз ететін, халықтың экономикалық әл-ауқатына тікелей ықпал ететін негізгі салалардың бірі. 2025 жылдың қаңтар–қазан айларында Батыс Қазақстан облысының ауыл шаруашылығы айтарлықтай өсім көрсетіп, жалпы өнім мен көрсетілген қызмет көлемі 280,6 млрд теңгеге жетті. Нақты көлем индексі 106,4% құрап, сектордың тұрақты дамып келе жатқанын көрсетті.

Қаржыландыру көлемі артып, инвестиция үш есе көбейді
Биыл агросаланы қолдауға 56,6 млрд теңге бөлінді, бұл өткен жылмен салыстырғанда 1,2 есе көп. Ауыл шаруашылығы тауарын өндірушілерді қаржыландыруға 35,2 млрд теңге көлемінде кредит ресурстары тартылды.

Салаға құйылған инвестиция көлемі де айтарлықтай артқан – жыл басынан бері 27,1 млрд теңге, бұл былтырғы көрсеткіштен үш есе жоғары.

Мемлекет басшысы Қасым-Жомарт Тоқаев машина-трактор паркін жаңарту қажеттігін атап өткен болатын. Биыл «ҚазАгроҚаржы» АҚ арқылы 14,4 млрд теңгеге 1 377 техника лизингке алынып, жыл соңына дейін өңірдің техника паркі 6,5%-ға жаңарады.

Егін шаруашылығы: жоғары маржиналды дақылдар көбейді

2025 жылы облыстағы барлық егіс алқабы 638 мың гектар болды. Оның ішінде:

• дәнді дақылдар – 288,7 мың га,
• майлы дақылдар – 137 мың га,
• мал азықтық дақылдар – 208,8 мың га.

Егіс құрылымын әртараптандыру нәтижесінде бұршақты дақылдар көлемі 1,9 есе, оның ішінде ноқат 2,4 есе, жасымық 1,6 есе артты.

Өнім жинау толық аяқталды:

• 365 мың тонна астық,
• 104 мың тонна майлы дақыл,
• 44 мың тонна картоп,
• 27 мың тонна көкөніс,
• 21,3 мың тонна бақша өнімі жиналды.

Кейбір шаруашылықтар – «Жаңа Жер» ШҚ, «Engontaim» ЖШС, «АгроСервисБатыс» ЖШС, «Серик Агро» ЖШС – гектарынан 30–32 центнер өнім алып, тәуекелді егіншілік аймағы үшін жоғары көрсеткішке қол жеткізді.

Өңірде 48 жылыжай кешені жұмыс істейді, оның ішінде екі өнеркәсіптік жылытылатын кешен бар. Сондай-ақ жалпы сыйымдылығы 66,3 мың тонна болатын 37 көкөніс қоймасы маусымаралық кезеңде тұрақты қамтуға мүмкіндік береді.

Суармалы жерлерді дамытуда жаңа қолдау тетігі іске қосылды

Биыл алғаш рет заманауи суару технологияларын сатып алуға 2,5%-бен 10 жылға жеңілдетілген несие беру бағдарламасы басталды. Бұл мақсатқа 3 млрд теңге бөлінді.

Инвестициялық шығындардың 80%-ын мемлекет субсидиялайды, нәтижесінде бір жылда 1757 гектар жаңа суармалы жер айналымға енгізілді.

Мал шаруашылығы: республикадағы ең ірі мал басы өңірі

Мал шаруашылығы облыстың ауыл шаруашылығы өнімінің 60%-ын құрайды. БҚО етті мал басы бойынша республикада бірінші орында.

2025 жылдың 1 қарашасындағы мал саны:

• ірі қара – 1 008 000 бас,
• қой – 1 239 000 бас,
• жылқы – 315 000 бас,
• құс – 1 137 000 бас.

10 айда:

• 73,1 мың тонна ет,
• 182,8 мың тонна сүт,
• 100,9 млн дана жұмыртқа өндірілді.

Өңірде жалпы сыйымдылығы 45,6 мың басқа арналған 16 бордақылау алаңы бар.

Қысқы мал азығына қажетті шөп көлемі толық қамтамасыз етіліп, 102,3% деңгейінде дайындалды.

Өңдеу саласы: 22 кәсіпорын жұмыс істейді

2025 жылдың 10 айында өңірде 93,6 млрд теңгеге тағамдық өнім өндірілді.

АӨК-тің 2025–2027 жылдарға арналған жол картасы аясында жалпы құны 68,1 млрд теңгелік 54 жоба жоспарланған. Биыл 18 жобаның 8-і іске қосылды.

Сүтті тауарлы фермалар бойынша:

• 3 жоба іске қосылды;
• біреуі жыл соңына дейін пайдалануға беріледі.

«КТК888» ЖШС-нің жаңа фермасы өңірдің сүтпен қамту деңгейін 22,3%-дан 39%-ға ұлғайтуға мүмкіндік береді.

Жәнібек ауданындағы «ECO CLUB» ЖШС теріден мал азықтық протеин өндіру жобасы желтоқсанда іске қосылады.

Ауыл аманаты: ауыл кәсіпкерлеріне нақты қолдау

«Ауыл аманаты» бағдарламасы аясында биыл 5,5 млрд теңгеге 855 жоба қаржыландырылады. Қазірдің өзінде 58 өтінім бойынша 604 млн теңге микрокредит берілді.

КПО-мен жасалған меморандум арқылы ауыл кәсіпкерлері өткен жылы 780 млн теңгеге өнім өткізді. Биыл жыл соңына дейін тағы 290 млн теңгенің өнімі тапсырылады.

Облыс бойынша өткізілген 480 ауылшаруашылығы жәрмеңкесінде тауарлар нарық бағасынан 10–15% төмен сатылды.

Сурет: Мезгіл.кз