Батыс Қазақстан облысының экономикасының басым бағыттары – мұнай-газ секторы, өңдеу өнеркәсібі, машина жасау, құрылыс индустриясы және агроөнеркәсіп кешені. Аталған салаларда 30 000-нан астам адам еңбек етуде, олар ішкі нарықты бәсекеге қабілетті өніммен қамтамасыз етіп қана қоймай, сыртқы нарыққа да экспорт жасайды.
2025 жылдың басынан бері облысқа 748,3 млрд теңге инвестиция тартылды, оның 80%-ы, яғни 597,1 млрд теңгесі жеке сектор үлесіне тиесілі. Алдағы бес жылда 4,4 трлн теңгеге 10 мыңнан астам жаңа жұмыс орнын құрумен 73 ірі инвестициялық жобаны жүзеге асыру жоспарланып отыр.
Тікелей шетелдік капиталды тарту мақсатында облыс делегациясы Чехия, Ресей, Иран, Қытай және Оңтүстік Корея елдеріне барып, өнеркәсіп, құрылыс, медицина, энергетика және ауыл шаруашылығы салаларында жалпы құны 1 трлн теңге болатын жобалар бойынша меморандумдарға қол қойды.
Маңызды жобалар қатарында:
«Batys POWER» компаниясының газ турбиналы электр станциясының қуатын 100 МВт-тен 414 МВт-қа дейін арттыру жобасы;
«ZhaikPetroleum Ltd» және Қытайдың «Foshan City Construction Engineering Co» бірлесіп жылына 130 мың тонна метанол өндіру кешенін салу;
«Chengtian Runkang Pharmaceutical» (Қытай) – киік етін қайта өңдеу жобасы;
«Persist Kazakh» K&K (Иран) – «Пуш Руно» тері өңдеу зауытын жаңғырту;
«Красная звезда» (РФ) – Орал қаласындағы кәріз жүйесін тазарту нысанының жобалау жұмыстары.
Осы ауқымды жобалар өңірдің инвестициялық тартымдылығын арттырып, жаңа өндірістер мен заманауи технологияларды енгізуге, сондай-ақ экономикалық өсу мен тұрақты даму жолында маңызды қадам болып табылады.
