Непалда әлеуметтік желілерді бұғаттауға қарсы наразылықта 19 адам қаза тапты
Непалда бірқатар әлеуметтік желілер мен мессенджерлердің бұғатталуына байланысты халық көшеге шығып, жаппай наразылық акцияларын өткізді. Алайда тәртіпсіздік кезінде кемінде 19 адам қаза тапқаны хабарланды. Бұл туралы Reuters агенттігіне сілтеме жасап «Азаттық» жазды.
Белгілі болғандай, ел аумағында барлығы 26 әлеуметтік желі мен платформаға тыйым салынған. Олардың қатарында YouTube, Facebook, WhatsApp, Instagram және X (бұрынғы Twitter) бар.
Ресми мәліметке сүйенсек, шектеу 4 қыркүйектен бастап күшіне енген. Биліктің түсіндіруінше, аталған платформалар Непалдағы Байланыс және ақпараттық технологиялар министрлігінде ресми тіркеуден өтпеген.
Әлеуметтік желілерді бұғаттау елде үлкен наразылық туғызып, адамдардың сөз бостандығына шектеу қойылды деген пікір кең тарады.
