Маңғыстау облысының Мұнайлы ауданында қардың еруі салдарынан ондаған тұрғын үй аумағын су басты. Жергілікті билік зардаптарды жою жұмыстары басталғанын мәлімдеді, деп хабарлайды Zhaiyqmedia ақпарат агенттігі.
Жыл басынан бері Мұнайлы ауданының тұрғындарынан су басуға қатысты жүзге жуық өтініш келіп түскен. 25 қаңтардағы мәлімет бойынша, Қызғалдақ көшесіндегі алты үйге су кірсе, тағы 75 үйдің ауласы су астында қалған.
Мұнайлы ауданы әкімдігінің хабарлауынша, көп жағдайда су үй маңындағы аумақтарда уақытша жиналған және тұрғын үйлерге айтарлықтай залал келмеген.
Қазіргі уақытта арнайы мамандар сорғылар мен дренаж жүйелерінің көмегімен суды тарту жұмыстарын жүргізіп жатыр. Су басу салдарын жою шаралары жалғасуда.
Аудан тұрғындарына су басу жағдайында +7 702 591 11 60 нөміріне хабарласуға кеңес берілді.
Фото: Әлеуметтік желіден
