Қазақстанда алаяқтықтың жаңа, күрделі түрі тарап жатыр: қылмыскерлер алдымен азаматтардың банк картасын бұғаттап, содан кейін өздері хабарласып, ақшасын жымқыруға тырысады, деп хабарлайды Zhaiyqmedia ақпарат агенттігі.
Алаяқтық схемасы былай жұмыс істейді: қаскүнемдер банкке қоңырау шалып, өзін карта иесі ретінде таныстырады. Олар картаны жоғалтып алғанын айтып, оны дереу бұғаттауды сұрайды.
Осыдан кейін алаяқтар картаның нағыз иесіне хабарласып, өздерін банктің қауіпсіздік қызметінің немесе құқық қорғау органдарының қызметкері ретінде таныстырып, сеніміне кіруге тырысады.
«Алаяқтар “картаны бұғаттан шығару” немесе ақшаны “қауіпсіз шотқа” аударуды сылтауратып, интернет-банкингке кіруге қажетті деректерді: SMS-кодтарды, құпиясөздерді немесе CVV/CVC-кодтарды алуға тырысады», – деп түсіндірді Ұлттық банк өкілдері.
Мамандар карта бұғатталған жағдайда тек банктің ресми call-орталығына хабарласу қажет екенін ескертеді. Оның нөмірі картаның артқы жағында немесе мобильді қосымшада көрсетілген.
Ұлттық банк қаржы ұйымдарының қызметкерлері ешқашан SMS арқылы келген құпиясөздер мен кодтарды сұрамайтынын және мобильді құрылғыға қашықтан қол жеткізуге арналған бөгде қосымшаларды орнатуды талап етпейтінін қатаң ескертті.
Фото: Әлеуметтік желіден
