Қазақстанда кәмелетке толмағандар арасындағы қылмыс деңгейі төмендеді. 2026 жылдың ақпан айының қорытындысы бойынша жасөспірімдер жасайтын қылмыс саны 24,3%-ға азайған, деп хабарлайды Zhaiyqmedia ақпарат агенттігі.
Ішкі істер министрлігінің мәліметінше, қазіргі таңда ішкі істер органдарында 2,9 мыңнан астам жасөспірім есепте тұр. Сонымен қатар бала тәрбиесіне салғырт қарайтын 6 мыңнан астам ата-ана да полицияның бақылауына алынған.
Құқық бұзушылықтың алдын алу мақсатында еліміздегі әр мектепке учаскелік инспекторлар, ювеналдық және криминалдық полиция қызметкерлері бекітілген. Олардың жалпы саны – 8 мыңға жуық.
Жыл басынан бергі екі айда кәмелетке толмаған балаларының түнгі уақытта үйден тыс жерде жүруіне жол бергені үшін 22 мыңнан астам заңды өкіл жауапкершілікке тартылды. Сондай-ақ жасөспірімдердің түнгі уақытта ойын-сауық орындарында болуына рұқсат еткен 685 кәсіпкер де жазаланды.
Фото: Әлеуметтік желіден
