Алматыда алаяқтар жаңа айла-тәсілге көшті: енді олар ақшаны банк картасына аудартудың орнына, жәбірленушінің үйіне «курьер» жіберіп, қолма-қол ақша алдырып жүр, деп хабарлайды Zhaiyqmedia ақпарат агенттігі.
Бұл туралы Алматы қалалық киберқылмысқа қарсы іс-қимыл басқармасы бастығының орынбасары Еркебұлан Қойшыбаев мәлімдеді.
«Алаяқтар банк карталарына ақша аударудан жиі бас тартып, оның орнына сыбайластарын «курьер» ретінде қолма-қол ақшаға жіберетін болды. Себебі фродқа қарсы жүйелердің жұмысы күшейіп, дроп-карталарды (бөтен адамдардың атына ашылған карталар) пайдалану тиімсіз болып қалды», – деді Еркебұлан Қойшыбаев.
Полиция өкілі осы схема бойынша жұмыс істеген төрт күдіктінің ұсталғанын жеткізді. Олардың жасы 20 мен 35 аралығында. Қазір тергеушілер ұсталғандардың басқа да қылмыстарға қатысы бар-жоғын тексеріп жатыр.
Жалпы, 2024 жылдың басынан бері Алматыда 2500-ден астам интернет-алаяқтық дерегі тіркелген. Келтірілген жалпы шығын көлемі – шамамен 2,5 миллиард теңге. Оның 700 миллион теңгесі зардап шеккен азаматтарға қайтарылды.
Фото: Әлеуметтік желіден
