Халықаралық музей күніне орай Астанадағы Бейбітшілік және келісім сарайында Қайта өрлеу дәуірінің данышпаны Леонардо да Винчиге арналған бірегей көрме ашылды, деп хабарлайды Zhaiyqmedia.kz ақпарат агенттігі.
Көрмеге әлемнің түкпір-түкпірінен жиналған 80-нен астам экспонат қойылған. Олардың арасында Леонардоның суреттері, ғылыми жазбалары және қолдан жасалған механизмдерінің үлгілері бар.
«Бұл көрме – ұлы ойшылдың өмірі мен еңбегіне терең үңілуге мүмкіндік. Леонардо тек суретші ғана емес, ол инженер, анатом және өнертапқыш болды», – деді көрмені ұйымдастырушылардың бірі.
Экспозицияда ұшқыш аппараттардың, су тасқынына қарсы құрылғылардың және әскери техникалардың прототиптері ерекше назар аудартады. Барлық механизмдер Леонардоның сызбалары бойынша қайта жасалған.
Көрме бір айға созылады. Ұйымдастырушылар мұндай іс-шаралар ғылым мен өнерге деген қызығушылықты арттырады деп сенеді.
