Мемлекет басшысы Қасым-Жомарт Тоқаев Қазақстан мен Сербия арасындағы достық қарым-қатынасты нығайтуға қосқан өлшеусіз үлесі үшін Сербия Президенті Александр Вучичті еліміздің ең жоғары мемлекеттік наградасы – «Алтын Қыран» орденімен марапаттады, деп хабарлайды Zhaiyqmedia ақпарат агенттігі.
Қасым-Жомарт Тоқаев Александр Вучичті халықтың қолдауына сүйеніп, елін алға жетелейтін нағыз көшбасшы әрі беделді саясаткер екенін атап өтті.
Сербия Сіз жүргізіп отырған салиқалы саясаттың арқасында зор жетістіктерге жетіп, өркендеп келеді. Халықаралық беделі де арта түсті. Алдағы уақытта еліңіз Сіздің парасатты басшылығыңызбен жаңа белестерді бағындыра береді деп сенемін. Сербия – Қазақстанның Балқан түбегіндегі сенімді серіктесі. Екі елдің қарым-қатынасы өзара қолдауға, түсіністік пен мызғымас достыққа негізделген, – деді Президент.
Сондай-ақ Мемлекет басшысы екіжақты сауда-экономикалық, инвестициялық және мәдени-гуманитарлық ынтымақтастықтың нығайып келе жатқанын, ал қазіргідей алмағайып заманда әріптестікті жандандырудың маңызы зор екенін жеткізді.
Президент орденді тапсыру сәтінде бұл марапаттың символдық мәніне тоқталды.
Бұл – қазақ жұртының Сізге және Сербия халқына деген зор ризашылығы және ерекше құрметінің белгісі. Өзіңізді шын жүректен құттықтаймын! Осы марапат екі елдің қарым-қатынасын одан әрі дамытуға ықпал етеріне кәміл сенемін. Қос халықтың достығы жасай берсін! – деді Қасым-Жомарт Тоқаев.
Фото: Әлеуметтік желіден
