Президент Қасым-Жомарт Тоқаев Креативті индустрияны дамыту қорының кеңсесін аралап, жұмысымен танысты. Бұл қор мемлекет басшысының тапсырмасымен отандық креативті секторды қолдау үшін құрылған, деп хабарлайды Zhaiyqmedia.kz ақпарат агенттігі.
Сапар барысында Тоқаев қордың жобалары мен жоспарлары туралы баяндама тыңдады. Қор креативті индустрия өкілдеріне гранттар бөліп, олардың өнімдерін нарыққа шығаруға көмектеспек.
«Креативті экономика – еліміздің дамуының маңызды бағыттарының бірі. Біз талантты жастарды қолдап, олардың идеяларын жүзеге асыруға жағдай жасауымыз керек», – деді Президент.
Қордың кеңсесі заманауи үлгіде жабдықталған. Мұнда коворкинг аймағы, көрме залы және шығармашылық студиялар бар. Жақын арада қор өңірлерде де филиалдар ашуды жоспарлап отыр.
