Тегеран екі аптаға созылған жоғары деңгейдегі кеңестерден кейін АҚШ-тың соғысты тоқтату туралы ұсынысына ресми жауап қайтарды. Иран өз талаптарын Пәкістан арқылы жеткізіп, уақытша бітімнен бас тартатынын мәлімдеді, деп хабарлайды Zhaiyqmedia ақпарат агенттігі.
IRNA агенттігінің мәліметінше, Иран ұсынған құжат 10 тармақтан тұрады. Онда Тегеран тек нақты шарттар орындалғанда ғана қақтығысты толық әрі түбегейлі тоқтатуға келісетінін айқын көрсеткен.
Негізгі талаптардың қатарында аймақтағы барлық әскери қимылды тоқтату, Ормуз бұғазында кеме қатынасының қауіпсіздігін қамтамасыз ету ережелерін бекіту, соғыстан кейінгі қалпына келтіру мәселелері және Иранға салынған барлық санкцияны толығымен алып тастау бар.
Бұл құжат Иранның батыс және орталық аумақтарындағы соңғы оқиғалардан кейін жолданғаны белгілі болып отыр. Иран тарапы АҚШ-тың десанттық операциясы сәтсіздікке ұшырағанын мәлімдеп, осылайша қақтығыста өзінің стратегиялық басымдығын дәлелдегенін алға тартты.
Осы оқиғалар аясында АҚШ президенті Дональд Трамптың да ұстанымында өзгеріс байқалады. Ол ультиматум мерзімін ұзартқанымен, Тегеранға бағытталған бұрынғы қатаң мәлімдемелері мен қоқан-лоққыларын айтарлықтай жұмсартқан.
Фото: Әлеуметтік желіден
