Мемлекет басшысы Қасым-Жомарт Тоқаев пен Пәкістан премьер-министрі Шахбаз Шариф екі ел арасында стратегиялық серіктестік орнату туралы бірлескен декларацияны бекітті, деп хабарлайды Zhaiyqmedia ақпарат агенттігі.
Бұл тарихи құжат екіжақты қарым-қатынасты жаңа деңгейге көтеріп, саяси, сауда-экономикалық және мәдени-гуманитарлық салалардағы ынтымақтастықты нығайтуға жол ашады.
Стратегиялық серіктестік аясында тараптар өңірлік қауіпсіздікті қамтамасыз ету, инвестиция тарту, көлік-логистика саласын дамыту және білім беру бағыттарындағы ықпалдастықты тереңдетуге уағдаласты. Сарапшылардың пікірінше, бұл келісім Орталық және Оңтүстік Азия арасындағы экономикалық байланыстарды жандандыруға елеулі серпін береді.
Құжатқа қол қою рәсімі Ақордада өтті. Бұл қадам Қазақстанның Азиядағы негізгі ойыншылардың бірі – Пәкістанмен байланыстың маңыздылығын айшықтайды.
Фото: Әлеуметтік желіден
