Қазақстандағы көптеген кәсіпкер оңайлатылған декларация режиміне ауысу кезінде қиындыққа тап болып, өтініштері кері қайтарылып жатыр. Мемлекеттік кірістер комитеті мұның негізгі себебін атады, деп хабарлайды Zhaiyqmedia ақпарат агенттігі.
Ведомствоның хабарлауынша, өтініштердің қабылданбауына Экономикалық қызмет түрлерінің жалпы жіктеуіші (ЭҚЖЖ) кодтарының қазіргі жіктеуішке сәйкес келмеуі себеп болып отыр.
Тәжірибе көрсеткендей, салық төлеушілер көбіне өзгертілген немесе тіпті күшін жойған ескі кодтарды пайдаланады. Мысалы, бұрынғы 86900 коды қазір 86901 және 86909 болып жаңартылған, ал 62022 коды жіктеуіштен толығымен алынып тасталған.
Осыған байланысты комитет өтініш жібермес бұрын кәсіпкерлерге тіркеу деректерін ЭҚЖЖ-ның өзекті нұсқасына сәйкестендіріп, жаңартып алуға кеңес береді. Деректерді ретке келтіргеннен кейін ғана өтінішті қайта тапсыруға болады.
Мемлекеттік кірістер комитеті оңайлатылған салық режиміне өту туралы хабарламаны 2026 жылдың 1 наурызына дейін тапсыруға болатынын еске салды.
Фото: Әлеуметтік желіден
