Қостанайда 30-дан астам ауылдасын алдап соққан екі тұрғынға қатысты сот үкімі шықты. Алаяқтар жәбірленушілерге 211 миллион теңгеден астам шығын келтірген, деп хабарлайды Zhaiyqmedia ақпарат агенттігі.
Тергеу деректеріне сәйкес, сотталушылар бір жылға жуық уақыт ішінде тұрғындардан «шетелден көлік әкеліп береміз» және «шоттағы тыйымды алып тастаймыз» деген сылтаумен ақша алған. Олардың бұл сөзіне сенген 34 жәбірленуші өздерінің жинаған-тергенін беріп қана қоймай, ірі көлемде несие рәсімдеп, ақшасын алаяқтардың қолына ұстатқан.
Нәтижесінде келтірілген жалпы шығын көлемі 211 миллион теңгеден асып жығылған. Сотта екі азамат та өз кінәсін мойындамады.
Сот үкімімен біреуі 6 жыл 8 айға, екіншісі 6 жыл 6 айға бас бостандығынан айырылды. Сонымен қатар екеуіне де 10 жыл бойы кәсіпкерлік қызметпен айналысуға тыйым салынды. Жәбірленушілердің азаматтық талап-арыздары толықтай қанағаттандырылды.
Сотталғандар жазасын қауіпсіздігі орташа мекемеде өтейтін болды. Үкім әлі заңды күшіне енген жоқ.
Фото: Әлеуметтік желіден
