Премьер-министрдің жұмыс сапары барысында үкімет басшысы Орал қаласында 11–12 қарашада өтетін Қазақстан мен Ресейдің XXI өңіраралық ынтымақтастық форумына дайындық барысымен танысты.
Облыс әкімінің орынбасары Қайыржан Меңдіғалиев Президент тапсырмасына сәйкес өңірде әлеуметтік инфрақұрылымның қарқынды дамып жатқанын атап өтті. Оның айтуынша, мұның айқын дәлелі – «ҚазМұнайГаз» компаниясы салған «Жайық арена» жаңа спорт-сауықтыру кешені.
Қазіргі таңда облыста 1500-ден астам спорт нысаны, соның ішінде 22 балалар мен жасөспірімдер спорт мектебі жұмыс істеп тұр. Бұл бұқаралық спортқа қызығушылық танытқан тұрғындар санының артуына ықпал етіп отыр. Сонымен қатар, жаңа спорт алаңдары мен бассейндер салу үшін жеке инвестициялар тарту бағытында да нақты қадамдар жасалуда.
Өңірде Qadam.AI жүйесін пилоттық режимде енгізу басталды. Бұл – Қазақстандағы спортты басқарудың алғашқы мультиплатформалы цифрлық экожүйесі. Жүйе спорт саласындағы қаржы бөлуден бастап, спортшылардың жеке нәтижелерін бақылауға дейінгі барлық үдерістердің ашықтығын қамтамасыз етуге бағытталған.
Форум қарсаңындағы бұл дайындықтар Батыс Қазақстан облысының инфрақұрылымдық және цифрлық әлеуетін көрсетіп, өңіраралық ынтымақтастықты жаңа деңгейге көтеруге жол ашады.
